Chârlèrwè qué sale payis Bob Deschamps et François Lemaire

Bén gna pont d'boune séson, i plout deus djous su trwès
Vos n'ôs'rîz nén vudi sins vos n'imperméyâbe
Ou vos risquèz d'yèsse tout cru come in vî misérabe.
Vos èdalèz quéqu'fwès pau pu clér des solias
Vos d'jèz "Tout l'mim.me dji crwès qui l'timps d'meura au bia"
Mins vos ramassez là yeune dè cès bounes nuwéyes
Qui vos fé racouri l'coyène vrémint trimpéye.
Si vos vos-è tirèz sins awè in catâr,
Vos plèz vos vinter d'yèsse in fameus chancard
Les alintours dè l'vile ? C'est tout rimpli d'berdouyes
C'n'est nén fé pour les djins, c'est bon pou les guernouyes
Et d'pus nos s'tons co pu blancs qu'des navias
Avou toutes les feumières qui vud'nut des fournias
Comint c'qu'on pout d'meurer dins ène parèye contréye ?
Adon qui gn'a des céns où c'qui l'solia lut tout' ène djournée.
Comint c'qu'on n'sè va nén vikî yusse qui fé bon
È evoyï bouler l'fayè payis wallon ?
Pouqwè ? Tout simplemint pace qu'on trouve dilé li,
Du mwins nous ses èfants, tout qwè c'qui fét pléji
In ètrangè pass'reut in djou à Chârlèrwè
Il âra vu, mon dieu, deus trwès bèles sakwès
Mins come souv'nir dè l'vile, qwè c'qu'il âra en somme ?
Putète deus trwès fotos, colèyes dins in albom
I n'âra nén compris tout qwè c'qu'il est pour nous
C'pètit bouket du monde qui nos a moustrè l'djoû
Nos Walonîye pour nous, c'est l'pus grande des merveyes
Et nos plons bén cachî, nos n'trouv'rons rén d'pareye
Qwè c'qui gn'a d'mieus qu'aute pau ? Vrémint dji nè l'sés nén
Pouqwè c'qu'on l'vwèt voltiye ? C'est pou tout, c'est pou rén
Pou in moncha d'biestrîyes qu'on n'saureut dîre li mînme.
Cor bén mînme après tout on n'sé nén come on l'inme
I faut l'awè quittè, awè pârti bén lon
Pou sawè come on tént à s'vî payis wallon.
I plout n'miyète di trop ? Mon dieu qué p'tite saqwè
Nos i èstons dalieurs tél'mint habituwès
Qui quand nos vwèyons l'solia qui lût wit d'jous sins r'lache
Nos souwétons rad'mint qu'il arrive ène boune drache.
Gn'a des feumières dijez, qui sôrt'nut des usines ?
Mins n'est-ce nén come coula qu'on sét mindji s'târtine ?
N'est-ce nén ces usines-là qui nos fèye nu vikî ?
Si èle i toûrn'rît pu, qwè c'qui nos d'vénrîs ?
Nos pourîs bén r'sèrer tél'mint fôrt nos boudène
Qui nos mindj'rîs bén râde les plantes pas leus racènes
Qwè c'qu'on dit co bén d'aute du Payis d'Chârlèrwè ?
On dit, c'est vré qu'on dit, qu'il est grossièr l'patwès
On dit du cén qui l'pârle qui c'èst yun d'èle basse classe
Mins r'niyî nos Wallon, n'èst-ce nén r'niyî nos race ?
Nos disfindons quék'fwès aus èfants dè l'pârler
Nos d'sons qu'c'est mau apris, nos d'sons qu'çoulà est léd
C'est qu'nos n'comperdons né lès biatés d'nos parlâdjes
C'est qu'nos autes i gna pon d'faustè dins nos lingâdje
Tout qwè c'qui nos pinsons nos l'disons plate et zake
Sins awè pou çoula dandjî d'tourner nos fraque
Vos d'sez qu'il est grossiè nos patwès d'Charlèrwè ?
Vos avèz p'tête réson mins savèz bén pouqwè ?
C'est qu'il a stî pârlé pa tout ces brâves ouyeûs
Qui n'sav'nut nén c'qwè c'est "awè peu"
Qui discindent'nu dins l'fosse en dijant des biestrîyes
Sins sondjî qu'is sont là in trin risquî leu vîye
Et c'est sôrtant dè l'bouche dè ces homes couradjeûs
Qui chène qui nos patwès est télcôp crapuleûs ?
Mins i gn'a qu'l'ér seûlmint parce qu'il a dins li mînme
Ene sakwè d'tél'mint bia qu'il oblidje à c'qu'on l'inme
Ene sakwè qui tént là èt qui fé qu'tout l'monde dit
Nos estons des Wallons èyèt nos l's'rons toudis.


Téléchargez le document word